Раççей шайĕнче иртекен тăван чĕлхене вĕрентекенсен конкурсĕнчен Печникова Мария Николаевна çĕнтерÿпе таврăнчĕ. Вăл çак конкурсăн юлашки турĕнче «Педагогикăри пысăк ăсталăхшăн» номинацире мала тухнă. Печникова М.Н. Шупашкарти 50-мĕш шкулта чăваш чĕлхипе литературине вĕрентет. Вăл вырăс шкулĕн 8-мĕш класĕнче чăваш чĕлхи вĕрентмелли хальхи учебникпа меслет сĕнĕвĕсен авторĕ. Раççей конкурсĕнче пирĕн республикăри вĕрентекенсем çулсеренех хутшăнаççĕ. Акă пĕлтĕр Йĕпреçри 2-мĕш шкул вĕрентекенĕ Алена Андреевна Ядрицова конкурсран çĕнтерÿçĕ ятне илсе таврăнчĕ.