14 кун хушши, çĕртме уйăхĕн 23-мĕшĕнчен пуçласа утă уйăхĕн 6-мĕшĕччен, хăйсен авалхи аслашшĕсен çĕрĕнче тулай чăвашĕсен 50 ачи канĕ. Ку ачасем – чăваш чĕлхипе литератури олимпиадисемпе конкурсĕсен çĕнтерÿçисем, чăваш чĕлхи вĕрентекен шкулсен чи лайăх ачисем тата чăваш чĕлхипе, йăли-йĕркипе, культурипе интересленекенсем. 
Ывăл ачасемпе хĕр ачасем пирĕн пата Тутар, Пушкăрт Республикисенчен, Марий Элтан, Самара, Ульяновск, Саратов, Оренбург, Пенза, Тюмень облаçĕсенчен тата Мускавран çитрĕç. 2005 çултах пуçланнă йăлапа килĕшÿллĕн «Эткер» вĕренÿ программи пурнăçланĕ. Унăн тĕллевĕ – ачасене чăваш халăхĕн культурине, йăли-йĕркине явăçтарасси. Ку тĕллеве пурнăçлама Вĕренÿ, Культура, Сывлăх министерствисем тата Чăваш наци конгресĕ хутшăнаççĕ.
Пултарулăх лабораторийĕсенче, ăста урокĕсенче ачасем чăвашла калаçу хăнăхăвĕсене аталантарĕç, чăваш халăх сăмахлăхĕпе, хальхи юрă-ташăпа, ал ăсталăхĕпе паллашĕç.