Туссем, халĕ шăпах 2011 çулăн пĕрремĕш çур çулĕнче илсе тăма хаçат-журнал çырăнмалли хĕрÿ тапхăр. Анчах сахăр, сахăр тенипе çăварта пылак пулас çук, "Тантăш”, "Тетте”, "Самант” çырăнăр тенипе пурте почтăна чупас çук. Ку вара кăлăхах! Мĕншĕн тесен, кам "Тантăш”, "Тетте”, "Самант” çырăнмасть, ну-у-май çухатать. Пĕрремĕшĕнчен, республикăри тантăшăрсен вĕренĕвĕпе канăвĕ, интереслĕ те пархатарлă ĕçĕсем çинчен урăх ниçта та тупса вулаймăр. Иккĕмĕшĕнчен, "Тантăшра” çеç патшалăхăн пĕрлĕхлĕ экзаменĕсен (ЕГЭ) çĕнĕлĕхĕсем, тăван чĕлхепе литература экзаменĕсенче тĕл пулакан ыйтусем, сочиненисен тĕслĕхĕсем пичетленеççĕ. Виççĕмĕшĕнчен, шăпах "Тантăшра”, "Теттере”, "Самантра” ача-пăча ÿкерчĕкĕсем, сăвви-калавĕ, сăн ÿкерчĕкĕсем пичетленеççĕ. Тăваттăмĕшĕнчен, "Тантăш” урлă çеç çывăх çыннăрсене кирек хăçан та, кирек мĕнле уяв ячĕпе те тÿлевсĕрех саламлама пулать. Пиллĕкмĕшĕнчен, хаçат-журнал ирттерекен тĕрлĕ конкурсра, викторинăра мала тухса республикипех палăрма май пур. Улттăмĕшĕнчен, хаçат е журнал çырăнса илекенĕн, унпа çыхăну тытаканăн портфолио пуянланать. Çиччĕмĕшĕнчен, "Тантăшпа” уйрăмах тачă çыхăну тытаканăн "Çулталăкри чи хастар юнкор” ята çĕнсе илсе "Орленок” лагерьте канас шанчăк пур. Саккăрмĕшĕнчен, хаçат-журналăн çывăх тусĕ-сем çулсеренех Президент елкинче савăнаççĕ. Тăххăрмĕшĕнчен, "Тантăш”, "Тетте”, "Самант” çырăннисене редакци ятарлă парнесемпе чыслать (логотипсем çырнă ручка, тетрадь, закладка, футболка т.ыт.те). Вуннăмĕшĕнчен, класри кашни вĕренекен е "Тантăш, е "Тетте”, е "Самант” çырăнсан "Тÿлевсĕр билет” тата "Пирĕнпе хаваслă” акцисене хутшăнса ушкăнпа Чăваш патшалăх пукане тата Çамрăксен театрĕсене тÿлевсĕр спектакль килсе курма пултарать. Çырăнтарăва ачасене хастар явăçтарнă учительсем "Тантăшăн” ятарлă Хисеп грамотисене тивĕçĕç. Çакăн хыççăн та "Тантăш”, "Тетте”, "Самант” çырăнмасăр юлакан пулĕ-ши; Тепĕр енчен, тем те пĕр пĕлекен çын тĕнче çавăрттарать теççĕ. Хăвăр юратнă ачапча хаçат-журналĕн-че вуласа пĕлнĕ хыпарсем килте, шкулта, урамра, библиотекăра пĕр- пĕринпе калаçмалли, сÿтсе явмалли сăлтав пулччăр. Вĕсем яланах ырра çеç вĕрентеççĕ! Ача-пăча кăларăмĕсене çырăнса илер те 2011 çулхи кăрлачăн 12-мĕшĕнче "Тантăш” 80 çул тултарнине пĕрле хаваслăн паллă тăвар!
Çыпăçтарнисем: |