Ака уйăхĕн 10-мĕшĕнче 9:00 сехетре Чăваш патшалăх университечĕн чăваш филологийĕпе культура факультечĕ «Уçă алăксен кунне» ирттерет. Пулас абитуриентсем тата вĕсен ашшĕ-амăшĕсем Чăваш филологийĕпе культура факультечĕн ĕçченĕсемпе тĕл пулса калаçма, факультетăн вĕренӳ тата йышăну йĕркипе паллашма, вĕренме кĕмелли экзаменсем çинчен тĕплĕнрех ыйтса пĕлме пултараççĕ. Тĕлпулу университет çурчĕн 1-мĕш корпусĕнче, 4 хутра, 434-мĕш аудиторире иртет.

Çак кунах пултарулăх конкурсĕ иртет. Театр ĕçĕпе специализациленес текенсем, эстрада тата халăх юрри, хореографи ăсталăхне алла илес текенсем пултарулăх конкурсне хутшăнма пултараççĕ.

Абитуриентсен пултарулăх конкурсĕнче сăвă е юптару каламалла, юрă юрласа памалла, ташласа кăтратмалла, пĕр-пĕр ситуацине выляса кăтартма пĕлмелле (этюд) — хăвăрăн пултарулăха пур енлĕн кăтартмалла.

Пулас абитуриентсем хăйсен музыка инструменчĕсемпе, диск-кассетăсемпе, костюмсемпе усă курма пултараççĕ.

Çавăн пек «Литература ĕçĕ» тата «Журналистика» специализацисене вĕренме кĕме кăмăл тăвас текенсен сăвă-калав, статья, очерк çырас ăсталăхне тĕрĕслеççĕ.

Пултарулăх конкурсĕнче пысăк балл пуçтарнă абитуриентсене вĕренме кĕнĕ чухне çăмăллăхсем пулаççĕ.

Абитуриентсене сумлă жюри членĕсем хаклĕç: Чăваш академии драма театрĕн режиссĕрĕ, ЧР тава тивĕçлĕ артисчĕ — И.И. Иванов, ЧР халăх артистки — В.А. Иванова, культурăн тава тивĕçлĕ ĕçченĕ — В.А. Милютин тата З.К. Яковлева, ЧР писателĕсен союзĕн членĕ — Елен Нарпи (Е.П. Чекушкина).

Ыйтса пĕлмелли: Шупашкар хули, Университет урамĕ, 38-мĕш çурт, 229 пӳлем (4, 12, 14, 21 маршрутлă троллейбуссемпе «Университет» чарăнăва çитмелле). Тел.: 45-23-39, 58-18-40.

Факультетпа çыхăнмалли телефон: (8-8352) 45-03-37 (31-01).

E-mail: irinakir1@mail.ru.

Тĕплĕнрех информацийе факультет сайтĕнче вуласа пĕлме пулать: http://chuvsu.ru/~chfik