Чăваш Республикин вĕренÿ тата çамрăксен политикин министерствинче Раççей шайĕнче иртекен тăван чĕлхене вĕрентекенсен конкурсĕнчи «Педагогикăри пысăк ăсталăхшăн» номинаци çĕнтерÿçипе Мария Печниковăпа «çавра сĕтел» иртрĕ.
Мария Николаевна конкурс тапхăрĕсем пирки тĕплĕн каласа пачĕ. Конкрса кашни хутшăнаканах (47 конкурсант пулнă) педагогикăра усă куракан вăрттăнлăхсене уçса пама пултарнине палăртрĕ çĕнтерÿçĕ. «Вĕренмелли питех те нумай, хам конкурса хутшăнма пултарнишĕн питех те савăнатăп,» - тесе пĕтĕмлетÿ турĕ М. Печникова.
С. Петрова, Вĕренÿ министрĕн çумĕ, чăваш чĕлхи вĕрентекенĕсен пултарулăхне палăртса хăварчĕ. Асăннă конкурсра вĕрентекенсем 2007-мĕш çултанпа хутшăннине, çулсеренех малти вырăнсене йышăннине каларĕ.
„Раççей конкурсĕнче пирĕн республикăри вĕрентекенсем çулсеренех хутшăнаççĕ. Акă пĕлтĕр Йĕпреçри 2-мĕш шкул вĕрентекенĕ Алена Ядрицова конкурсран çĕнтерÿçĕ ятне илсе таврăнчĕ.
Печникова М.Н. Шупашкарти 50-мĕш шкулта чăваш чĕлхипе литературине вĕрентет. Вăл вырăс шкулĕн 8-мĕш класĕнче чăваш чĕлхи вĕрентмелли хальхи учебникпа меслет сĕнĕвĕсен авторĕ. Пултарулăхĕ нумай енлĕ Мария Николаевнăн, конкурсри çитĕнÿсемшĕн ăна чунтан саламлатпăр,” – тесе вĕçлерĕ сăмахне Светлана Владимировна.