Шупашкарта Вĕрентекенсен пĕлĕвне ӳстерекен институтра наци культурин «Туслăх хĕлхемĕ» фестиваль иртрĕ. Унта тĕрлĕ район шайĕнче çĕнтерӳçĕ ятне çĕнсе илнĕ 6-9 классенче вĕренекенсем хутшăнчĕç. Çак фестивальте Красноармейски районĕнчи шкул ачисем те хăйсен пултарулăхне кăтартрĕç. Фестиваль программипе килĕшӳллĕн вĕсем тăватă ăмăртуран иккĕшĕнче тупăшрĕç, малти вырăнсене тивĕçрĕç.

«Чăвашлăх тĕнчи: тĕпчев ĕçĕсен мультимедиллĕ презентацийĕ» конкурсра Красноармейскинчи пĕтĕмĕшле вăтам пĕлӳ паракан иккĕмĕш шкулĕнче 9-б класра вĕренекен Алексей Михайлов «К.В.Ивановăн «Нарспи» поэминчи çутçанталăк сăнарĕ» темăпа хатĕрленĕ ĕçне хӳтĕлесе 2-мĕш вырăн йышăнма пултарчĕ. Вырăс класĕнче чăваш чĕлхипе литератури тата тăван ен культури вĕренекен шкул ачисем хушшинче ирттернĕ «Çăлтăрчăк» вăйă-конкурсра вара Трак чăваш-нимĕç гимназийĕн 9-мĕш класĕнче вĕренекен Иванова Наталия та 2-мĕш вырăна тивĕçнĕ.